Посебен режим на сообраќај -Претседателот на националното собрание на Турција во посета на Македонија

Во земјава денеска во официјална тридневна посета ќе престојува делегација предводена од Нуман Куртулмуш, претседател на Големото национално собрание на Република Турција.

Како што информираше собраниската прес-служба, Куртулмуш ќе оствари тет-а-тет средба со претседателот на Собранието Африм Гаши, а ќе се сретне и со пратеничката група за соработка со Парламентот на Република Турција. Предвидено е Куртулмуш да се потпише во Книгата на впечатоци и да има изјави за медиуми.

Како што информираат од Големото национално собрание на Република Турција, Куртулмуш ќе се сретне и со премиерот Христијан Мицкоски и со претседателката Гордана Силјановска Давкова.

На средбите, како што се наведува во најавата објавена на Големото национално собрание, ќе се разговара за глобалните и регионалните прашања, како и за билатералните и меѓупарламентарните односи.

Поради официјалната посета на делегација предводена од претседателот на Големото национално собрание на Република Турција од денеска до понеделник во Скопје ќе има посебен сообраќаен режим.

– СВР Скопје ги известува граѓаните на Скопје дека од 21 до 23.12.2024 (од сабота до понеделник) поради официјалната посета на делегација предводена од претседателот на Големото национално собрание на Република Турција, од страна на Единицата за безбедност на патниот сообраќај при СВР Скопје ќе бидат преземени мерки за посебен режим на сообраќајот по сообраќајниците на поширокото централно подрачје на град Скопје, информираа од МВР.

Share on Facebook

Tweet

Follow us

Save