РУСКИ ПРОЕКТИЛ НАВОДНО ПАДНАЛ ВО ПОЛСКА!

За време на ноќните воздушни напади врз Украина, руски проектил наводно влегол во полскиот воздушен простор и паднал во поле во областа Љублин, изјави полскиот премиер Доналд Туск, објави „Frankfurter Allgemeine Zeitung“.

„Информацијата е јасна“, изјави Туск, пренесуваат полските медиуми. „Бевме подготвени да го собориме проектилот доколку продолжеше да лета.“ Туск инцидентот го опиша како „сериозен“.

Оперативната команда на полските вооружени сили претходно соопшти дека борбен авион Ф-16 полетал во 3:40 часот во четвртокот наутро поради нарушување на полскиот воздушен простор од непознат објект. Поради тоа, во областа Љублин биле активирани воздушни сирени.

На местото каде што се претпоставува дека паднал проектилот, во близина на селото Тарнава-Колонија, околу 50 километри јужно од Љублин, според извештаите на полските медиуми, се создал кратер со дијаметар од околу десет метри. Во околните села се слушнала силна експлозија, а прозорците на куќите се затресле.

Според украинскиот министер за надворешни работи Андриј Сибиха, проектилот кој влегол во полскиот воздушен простор бил руска крстосувачка ракета од типот Х-101.

Туск, полскиот министер за одбрана Владислав Косинијак-Камиш и министерот за внатрешни работи Марчин Кермински отпатувале во областа Љублин на консултации со кризниот штаб.

Share on Facebook

Tweet

Follow us

Save