Трага од убиство во Белгија води кон Македонија: Осомничени се двајца македонски државјани, извршени се претреси во Скопје

Постапувајќи по барање за меѓународна правна помош, Основното јавно обвинителство Скопје и Министерството за внатрешни работи презедоа повеќе комплексни истражни дејствија по барање на белгиските истражни органи, вклучувајќи и два претреси во Скопје со цел обезбедување докази за убиство од користољубие извршено во Белгија – соопшти Јавното обвинителство.

Белгиското обвинителство води постапка за убиство извршено во Остенд, Белгија, откако на 21 март било пронајдено безживотно тело на жена фрлено во близина на граничниот појас меѓу Белгија и Холандија.

Во досегашната постапка на белгиските истражни органи обезбедени се докази за инволвираност на двајца македонски државјани во овој настан, од кои едниот веќе се наоѓа во притвор во Белгија и очекува судење.

Како дел од истрагата за вклученост на вториот македонски државјанин, белгискиот истражен судија побарал од Основното јавно обвинителство Скопје да преземе повеќе истражни дејствија. Врз основа на обезбедени наредби од Основниот кривичен суд Скопје, биле извршени и претреси на две локации во Скопје.

„Јавен обвинител и истражниот центар на скопското обвинителство, како и повеќемина припадници на Министерството за внатрешни работи ги реализираа сите активности согласно барањето за меѓународна правна помош“ – се вели во соопштението на ОЈО.

Од белгиска страна, при спроведувањето на истражните дејствија во Скопје, биле присутни истражен судија, јавен обвинител и претставници на белгиската федерална полиција, кои високо ја оцениле соработката со македонските истражни органи.

– Овој предмет е вистински школски пример за совршена меѓународна соработка помеѓу јавните обвинители и полициските службеници од Република Северна Македонија и европските правосудни и полициски органи – оцени претседателот на Истражниот оддел на Првостепениот суд на Западна Фландрија, истражниот судија Кун Витук по акцијата во која беа обезбедени докази важни за постапката пред белгискиот суд.

Share on Facebook

Tweet

Follow us

Save