Трамп најави испраќање на дополнителни 5.000 војници во Полска

Американскиот претседател Доналд Трамп објави дека САД ќе испратат дополнителни 5.000 војници во Полска. Трамп напиша на социјалната мрежа „Truth social“ дека ја донел одлуката врз основа на изборот на сегашниот полски претседател Карол Навроцки, кого го поддржал на изборите, како и односите на Навроцки со САД.

Во моментов во Полска се стационирани околу 8.500 американски војници, според податоците од полското Министерство за одбрана од јануари 2026 година. Бројката варира поради ротацијата на единиците, а во некои периоди достигнува околу 10.000 војници. Поголемиот дел од овие сили не се трајно стационирани, туку доаѓаат преку ротациони мисии на НАТО и билатерални мисии. Има неколку стотици трајно распоредени американски војници (околу 369, според американските податоци), додека останатите се копнени, воздушни и логистички единици кои ротираат.

Полскиот претседател му се заблагодари на Трамп

Полскиот претседател Карол Навроцки му се заблагодари на американскиот претседател Доналд Трамп по одлуката на Вашингтон да испрати дополнителни 5.000 војници во Полска. „Јас стојам и ќе продолжам да стојам на стража над полско-американскиот сојуз, витален столб на безбедноста за секој полски дом и за цела Европа. Добрите сојузи се оние што се темелат на соработка, меѓусебно почитување и посветеност на нашата заедничка безбедност“, рече Навроцки во објава на социјалната мрежа X. Во таа пригода, тој му се заблагодари на Трамп за неговото пријателство кон Полска и за одлуките „чија практична димензија е многу јасно видлива денес“. „Безбедноста на Полска и полскиот народ е мој врвен приоритет“, заклучи Навроцки.

Share on Facebook

Tweet

Follow us

Save