Умеров пред преговорите со САД: Безбедноста на Украина мора да биде сигурно и долгорочно гарантирана

Украинските мировни преговарачи денеска почнуваат нова рунда разговори со американскиот тим за предлози за прекин на војната со Русија, објави главниот украински преговарач Рустем Умеров на Телеграм.

Тој додаде дека на разговорите во САД ќе бидат вклучени и европските партнери на Киев.

-Ние сме конструктивно ориентирани. Веќе одржавме прелиминарни консултации со нашите европски колеги и се подготвуваме за понатамошни разговори со американската страна. Безбедноста на Украина мора да биде сигурно и долгорочно гарантирана, посочи Умеров.

Администрацијата на американскиот претседател Доналд Трамп се стреми да ја заврши речиси четиригодишната војна. Специјалниот американски претставник Стив Виткоф и зетот на Трамп, Џаред Кушнер во текот на неделата имаа разговори со украински и европски претставници во Берлин.

Украинскиот претседател Володимир Зеленски изјави дека Украина и САД постигнале договор за неколку документи, вклучувајќи мировна рамка од 20 точки, безбедносни гаранции и план за реконструкција на Украина. Тој истакна дека не е постигнат договор за координирани конечни предлози, додавајќи дека територијалните прашања остануваат нерешени.

Претседателот на Русија, Владимир Путин на денешната годишна прес-конференција не понуди компромис за неговите услови за завршување на војната во Украина, но истакна оти Киев и Европа треба да го направат следниот чекор.

Официјален претставник на Белата куќа наведе дека Виткоф и Кушнер викендот ќе имаат средба со руската делегација во Мајами.

Share on Facebook

Tweet

Follow us

Save