Фетаи тврди дека Владата не се откажала од уставните измени

Вицепремиерот за добро владеење и еден од лидерите на коалицијата ВЛЕН, Арбен Фетаи синоќа во гостување на ТВ Алсат порача дека како Влада не се откажале од уставните измени, како одговор на најновиот извештај на ЕК за напредокот на земјата на патот кон ЕУ.

„Не се откажавме од уставните измени или од европската агенда. Имавме изборен процес кој траеше 3 месеци и тоа е сосема природно. Сигналите од Брисел се јасни, нема изненадувања. Верувам дека по завршувањето на локалните избори треба да седнеме како коалициски партнери и да го дефинираме патот напред, да ги добиеме потребните гаранции дека нема да има дополнителни услови и да продолжиме напред“, вели Фетаи.

Според него, ова е ставот на Владата и во овој поглед верува дека ќе седнат и ќе ги дефинираат следните чекори.

„Очекуваме дека дијалогот со Софија и Европската Унија и земјите-членки ќе започне многу брзо за да се најдат модалитети што ќе ни овозможат да го продолжиме нашиот европски пат за отворање преговори со ЕУ“, рече Фетаи гостувајќи во дебатна емисија.

Share on Facebook

Tweet

Follow us

Save