Мицкоски за Денот на албанската азбука: Македонија е дом на различности кои ја збогатуваат нашата заедничка национална приказна

Говор на претседателот на Владата, Христијан Мицкоски по повод Денот на албанската азбука.

„Почитувани гости,

Дами и господа,

Денес сме собрани за да го одбележиме Денот на албанската азбука.

Ден кој носи силна историска и културна симболика.

Ден поврзан со градот Битола и со еден од најзначајните моменти во модерната албанска историја – Конгресот во 1908 година.
Тогаш, во Битола, град што прераснат во центар на напредни идеи, движења и визии, албанската интелигенција го направи крупниот чекор кон создавање на една унифицирана азбука, темел на јазичната и културната кохезија на Албанците.

Тоа беше чин со длабоко европско значење.

Чин на модернизација, образование и отвореност.

Во период кога Балканот минуваше низ тешки предизвици, Битолскиот конгрес покажа дека силата на едно општество произлегува од знаењето, од јазикот и од вербата во иднината.

Драги сограѓани,

Овој ден е важен и за нашата држава.

Македонија е дом на различности кои не разделуваат, туку ја збогатуваат нашата заедничка национална приказна.

Албанската заедница со својата култура, јазик, традиции и вредности е суштински дел од нашата држава.

Денес, кога го одбележуваме Денот на албанската азбука, оддаваме признание на напорите на генерации кои се бореле за образование, писменост и културен развој, но и на сите кои денес го продолжуваат тој пат.

Нашата заедничка татковина се темели на идејата дека секој граѓанин има еднакво место, еднаква вредност и еднаква можност.
Токму затоа, Владата останува посветена на политики кои градат меѓуетничка доверба, создаваат простор за достоинствен развој на јазиците и културите и ја зајакнуваат кохезијата меѓу сите наши граѓани.

Имаме амбиција и сакаме да градиме општество во кое младите Македонци, Албанци, Турци, Срби, Бошњаци, Роми, Власи и сите други ќе ја гледаат својата иднина овде – во силна и развиена татковина.

Општество во кое секој јазик е мост, а не граница.

Сила, а не поделба.

Богатство, а не предизвик.

 Почитувани пријатели,

Во оваа насока, Владата активно работи на проекти кои создаваат подобар живот за сите граѓани, без разлика на нивната етничка припадност.

Посветени сме на унапредување на инфраструктурата и можностите во секоја општина, на модернизација на училиштата, на поддршка на културните институции и на отворање нови можности за младите.

Во тек се програми за дигитализација на услугите, за економски развој на локалните заедници и за јакнење на институциите што се грижат за рамноправност и интеграција.

Нашата цел е секој граѓанин, во секој дел од државата, да го почувствува напредокот и да знае дека државата стои зад него. Ова не е само политичка обврска, туку морална должност кон идните генерации.

Дозволете ми, на крај, да упатам порака која е суштинска за нашата сегашност и за иднината што сакаме да ја градиме: успехот е наш заеднички проект.

Само ако сме обединети во почит, доверба и одговорност, ќе можеме да постигнеме резултати што ќе ја движат татковината напред.

Нека е честит Денот на албанската азбука.

Да продолжиме да ја градиме нашата заедничка татковина со почит кон различностите и со јасна визија за иднината. – рече Мицкоски.

Share on Facebook

Tweet

Follow us

Save