Полска е подготвена да ги прими американските војници од Германија

Полскиот претседател Карол Навроцки во средата изјави дека Полска е подготвена да биде домаќин на американските војници кои би биле повлечени од Германија и најави дека лично ќе лобира кај американскиот претседател Доналд Трамп да ги испрати на исток. Понудата доаѓа во време кога Пентагон се подготвува да повлече околу 5.000 војници од Германија во текот на следната година, а Трамп навести дека намалувањата би можеле да бидат уште поголеми, пишува Политико.

„Доколку претседателот Доналд Трамп одлучи да го намали американското воено присуство во Германија, ние во Полска сме подготвени да примиме американски војници“, рече Навроцки за време на вежбата на НАТО во Литванија. Тој додаде дека Полска веќе има „подготвена инфраструктура“ за таков потег.

Разговорите меѓу Варшава и Вашингтон за проширување на американското воено присуство во Полска веќе се во тек „на воено и дипломатско ниво“, потврди заменик-министерот за надворешни работи Марчин Босацки за „Полсат њуз“. Тој додаде дека Полска нема да се спротивстави на сместувањето на војниците што ја напуштаат Германија, иако владата воопшто не сака тие да бидат повлечени од Германија.

Министерот за надворешни работи Радослав Сикорски на конференцијата за одбрана во Варшава изјави дека дополнителните американски сили „ќе бидат добредојдени во Полска“ без оглед на тоа од каде се преместуваат. Полска моментално е домаќин на околу 10.000 американски војници, додека Германија е домаќин на приближно 36.000.

Share on Facebook

Tweet

Follow us

Save