За одредени пациенти имало и до осум лекари, не може да се бара индивидуална одговорност, вели одбраната во случајот „Онкологија“

Во лекувањето на одредени пациенти учествувале од три до шест или осум стручни медицински лица, не може да се бара индивидуална одговорност, тврди одбраната за случајот „Онкологија“, кој се води против поранешниот директор на Клиниката за онкологија, Нино Васев, и уште двајца онколози, обвинети за несовесно лекување пациенти.

Техничкиот советник на првообвинетиот, доктор Владимир Даниловски, на денешното сослушување во Основниот кривичен суд во Скопје, одговарајќи на директни прашања од одбраната, укажа дека по дополнителни увиди во целокупната документација за лекувањето одделни пациенти, утврдил дека вештото лице на Обвинителството – доктор Маја Радник од Словенија – не располагала со целокупната медицинска документација за лекувањето кај повеќе пациенти.

Од 165 достапни документи за дадена терапија на еден конкретен пациент, Даниловски нагласи дека на вештото лице Маја Радник ѝ биле дадени 60, а кај друг пацинет, како што посочи, не биле дадени медицински документации за 11 години лекување, туку само за последните неколку месеци.

Во својот исказ Даниловски исто така посочи повеќе пациенти чие лекување почнало кај Мери Пешевска, која како второобвинета во предметот призна вина и судот ја осуди на две години условна казна затвор, но и пациенти што се лекувале кај други онколози или надвор од Клиниката за онкологија, како и дека во лекувањето на одредени пациенти учествувале од три до шест, а во некои случаи и осум стручни медицински лица.

Според Даниловски, не може да се направи изолирана процена на лекување на пациентите, туку треба да се направи увид и процена на уделот во лекувањето на сите онколози, кои учествувале во лекувањето на пациентите, укажувајќи дека носењето терапевтски одлуки не било изолиран, туку континуиран клинички процес.

Според одбраната, од вкупно 31 пациент што му се ставаат на товар на Нино Васев, тој учествувал во лекувањето на шест пациенти. Од 35 лекари на Клиниката, дури 28 учествувале во лекувањето на овие пациенти, што според одбраната покажува дека не може да се бара индивидуална одговорност за лекувањето на вака сложена болест.

Бранителот на Васев, адвокатот Боби Спирковски, во изјава за медиумите на пауза од денешното рочиште посочи дека Мери Пешевска, која призна вина за злоупотреба на печатите, учествувала во лекување на дури 22 од овие пациенти и ќе биде повикана како сведок во судот.

Share on Facebook

Tweet

Follow us

Save