26 години од загинувањето на тројцата полицајци кај Арачиново

Министерот за внатрешни работи Панче Тошковски денеска, со положување цвеќе, им оддаде почит на полициските херои Кирил Петрушевски, Ацо Ангеловски и Ерол Готак во кругот на Полициската станица Гази Баба кои пред 26 години трагично загинаа на 11 јануари 2000 година во заседа кај влезот во селото Арачиново.

Во објава на социјалните мрежи, Тошковски наведува дека тие биле подмолно и сурово убиени при извршување редовна полициска контрола.

– Македонија никогаш не ги заборава своите храбри синови. Денеска се навршуваат 26 години од трагичната смрт на полициските службеници и македонски херои Кирил Петрушевски, Ацо Ангеловски и Ерол Готак. Во 2000 година, при извршување редовна полициска контрола на влезот во селото Арачиново, тие подмолно и сурово беа убиени во заседа. Со длабока почит кон нивната жртва, денес положив свежо цвеќе пред споменикот на бранителите во кругот на Полициската станица Гази Баба, со јасна порака дека нивното херојство никогаш нема да биде заборавено, вели Тошковски.

Хероите на Македонија, додава Тошковски, живеат вечно во колективната меморија, а нивната жртва, како што вели, останува траен завет за сегашните и идните генерации.

Share on Facebook

Tweet

Follow us

Save